Përktheu: Arben Idrizi
E tëra zhvillohet në një stadium të rrethuar me mure të larta. Në fund të skenës, në qendër, një portë e fushës së futbollit e shndërruar në banesë.
Personazhet:
892, shefi
584, më i vjetri
137, më i riu
Gruaja
Pamja e parë: Patrulla e natës
584 Një antenë!
892 E vodhe një antenë!
137 Nuk e vodha! Nuk vodha! E mora!
584 Nga ku?
137 Nga një ballkon.
892 Hyre në një shtëpi…
584 Dole në ballkon…
892 Dhe e… more një antenë?
137 Pak a shumë.
584 Dhe nuk ishte askush aty?
137 Ku?
892 Në shtëpi?
137 Po, ishin të gjithë në tavolinë.
584 Po hanin?
137 Të gjithë tok? Jo bre! Po shikonin televizorin.
892 Dhe ti hyre…
137 Po, thashë “mirëmbrëma, më duhet të shkoj në ballkon.”
584 E ata?
137 Hiç.
892 Hiç?
137 Jo, nuk e hapën gojën fare. Dukeshin të trembur.
584 Sa ishin?
137 Babai, nëna dhe tre fëmijët.
892 Përreth një tavoline?
137 Po.
584 Një familje e tërë?
137 Ishte edhe dikush tjetër, aty diku, ndoshta në krevat, ose i sëmurë.
892 E ku e di ti?
137 Po shikonte televizor edhe ai; mandej, kur e nduka antenën, nisi të bërtiste.
584 E vodhe një antenë!
137 Nuk e vodha, bre! Nuk e vodha! Sa herë duhet të ta them! Vetëm e mora. Unë… nuk kam pasur antenë kurrë, e merr vesh ti?
892 Nuk kishit televizor?
137 Po!
584 Po si e shikonit?
137 Im atë e kishte lidhur televizorin tonë me antenën e fqinjëve. Kurrë s’i patën rënë në të.
892 Ah, domethënë e paskeni ves në familje!
137 Çka?
584 Babi yt, edhe ai kishte vjedhur…
137 Marrë! Babai im kishte marrë pakëz sinjal. Ishim të skamur. Nuk kishim as edhe një kafshatë buke për të ngrënë. Ja pra!
892 Mirë de, sidoqoftë, nuk na duhet asnjë antenë.
137 Jo?
584 Jo. Nuk do të kemi televizor.
137 Ah, jo a?
892 Bile as radio.
137 As radio?
584 Nuk na duhen, as televizori as radioja!
137 Nuk na duhen?
892 Jo!
137 Mira, po e kthejmë.
892 Ti nuk do të shkosh askund!
584 Do të të arrestonin!
137 Për një antenë?
892 Ti e di si qëndrojnë punët tash.
584 I arrestojnë të gjithë, për hiçgjë.
137 Ç’të bëj?
892 Me antenën?
137 Po, ç’të bëj me të?
892 Nuk e di. Punë për ty.
137 Do të mund të bëja… po, një nga ato gjërat për ta pjekur mishin. E thyej, i lidh copat e hekurit njërën me tjetrën dhe e bëj një… si quhet?
584 Skarë.
137 E pra, e bëj një skarë. Mendojeni pak sa mishin mund ta pjekim dhe hamë!
892 Po ku e gjen mishin? E merr edhe atë?